A Axencia de Turismo de Galicia e a Axencia Galega de Desenvolvemento Rural (AGADER) establecen un acordo de colaboración respecto das actuacións públicas sobre servizos e actividades turísticas que se poidan realizar no marco do PEPAC 2023-2027.

O convenio establece o marco de traballo conxunto, os compromisos das entidades participantes e os criterios de financiamento e seguimento das actuacións, garantindo a correcta execución dos proxectos e a visibilidade do apoio da Xunta de Galicia.

No marco deste acordo, a través dos Grupos de Desenvolvemento Rural (GDR) apoiaranse accións de promoción e dinamización turística que poñan en valor os recursos naturais, culturais e patrimoniais do territorio, fomentando un modelo de turismo sostible e ligado á identidade local.

• Subvención de operacións de terceiros, a través dos GDR.

  Poderán subvencionarse unicamente:
  a) Investimentos que supoñan a creación de establecementos de restauración
  b) Investimentos que supoñan a creación de establecementos de aloxamentos turísticos
  c) Investimentos tendentes á creación e/ou mellora de empresas de servizos turísticos complementarios.
  d) Actuacións sobre rutas de sendeirismo homologadas pola Federación Galega de Montaña.
  A localización dos investimentos deberá situarse nalgún dos concellos sinalados no Anexo I do acordo.

• Subvención de operacións desenvolvidas polos GDR.

  Poderán subvencionarse:
  a) Proxectos de sinalización turística promovidos polos GDR.
  b) Operacións de formación, no marco das estratexias dos GDR, dirixidas á profesionalización do persoal en servizos turísticos.