O Concello de A Peroxa acolleu a derradeira actividade da programación Coñece e Saborea Comarca de Ourense, promoción e posta en valor do patrimonio natural, cultural e gastronómico dos concellos integrantes de Adercou.
A actividade levouse a cabo polos guías da empresa de turismo activo, Surbia Natura, en estreita colaboración coa técnica de turismo de A Peroxa, Verónica e co alcalde Manuel Seoane.
A recepción dos participantes, chegados de distintos puntos de Galicia, foi na Casa do Concello, desde onde iniciamos unha ruta de sendeirismo circular de doce quilómetros de dificultade media.
Visitamos as localidades de As Paraxas, Lentomil co seu pazo e casa grande, Vilaboa, fermosos bosques de carballeiras, o Campo de Amparo coa súa capela de estilo renacentista e a contorna do Castelo de A Peroxa, paraxes integrados no xeodestino turístico Ribeira Sacra, nomeado reserva da biosfera pola Unesco.
Tras a ruta, os participantes achegámonos ao establecemento A Casa do Agro onde puidemos degustar saborosas elaboracións feitas con produtos de proximidade.
Ao remate, visitamos o centro de interpretación O Lebre das Casarizas, guiados pola técnica de turismo do Concello de A Peroxa.
Esta xornada puxo o colofón ao programa Coñece e saborea comarca de Ourense, co que puidemos descubrir a riqueza cultural, natural e gastronómica de 8 concellos (A Merca, Barbadás, Coles, Amoeiro, Gomesende, San Cibrao das Viñas, Toén, A Peroxa), adheridos ao noso Grupo de Desenvolvemento Rural Adercou.
